Проф. д-р Живко Јанкулоски е претседател на Партијата на обединети демократи на Македонија – ПОДЕМ, универзитетски професор, истакнат општественик и политичар со долгогодишно искуство во јавниот, академскиот и политичкиот живот на Република Македонија.

Своето високо образование го стекнал на Земјоделскиот факултет при Универзитетот „Св. Кирил и Методиј“ во Скопје, каде дипломирал, магистрирал и докторирал, а своето стручно и научно усовршување го надградил и во Франција и САД.

Во текот на својата професионална и општествена кариера, проф. д-р Живко Јанкулоски извршувал бројни одговорни функции во стопанството, образованието и јавниот живот. Бил дел од раководните структури во ЗИК „Пелагонија“ – Битола, а како универзитетски професор оставил значаен белег во развојот на високото образование на Универзитетот „Св. Климент Охридски“ – Битола, каде извршувал и повеќе значајни академски должности.

Неговото политичко дејствување е обележано со активна и принципиелна посветеност на демократските процеси, институционалниот развој и интересите на граѓаните. Во својата јавна дејност бил пратеник во Собранието на Република Македонија, а ја извршувал и функцијата заменик-претседател на Владата на Република Македонија.

Како основач и претседател на ПОДЕМ, проф. д-р Живко Јанкулоски претставува симбол на доследност, политичка одговорност и визија за демократска, достоинствена и просперитетна Македонија. Неговото дејствување се темели врз вредностите на чесноста, принципиелноста, националната одговорност и посветената работа во интерес на државата и на граѓаните.

Под негово раководство, ПОДЕМ продолжува да се афирмира како политички субјект што се залага за единство, развој, стабилност и нова перспектива за Македонија.